Полихроно

Полихроно сосема оправдано го носи епитетот за еден од трите бисери на Касандра. Ова место е познато од дамнешни времиња, при што се верува дека него го формирале доселениците од Еретрија во 650 година п.н.е. и го нарекле - Неаполис. Подоцна градот го уништуваат Хуните, за да на неговото место локалните сточари многу години потоа, го формираат денешното Полохроно. Името го добило по многубројното и разнобојното цвеќе со кое и денес се карактеризира неговата околина. Последните освојувачки уништувања ги доживува во 1821 година од Турците, за да конечно биде слободно во 1912 година. Ова некогашно рибарско село, кое со многуте други места на полуостровот Халкидики последните триесетина години доживеа вистинска туристичка експанзија, денес заедно со блиските Ханиоти и Пефкохори, го има статусот на едно од најпосетените. Располагајќи со исклучително добра и организирана инфраструктура, Полихроно веќе прерасна во вистинска туристичка мека. Прекрасната градска плажа долж чистото море, зеленилото, мноштвото објекти за сместување, угостителските и трговските дуќани, забавните содржини... го пленат и најпробирливиот летен гостин. Континуираниот интерес за Полихроно на македонскиот пазар и оваа година придонесе да го вброиме меѓу летните дестинации.